Økonomiske konsekvensar av våndskader - ekstra kostnadar i planteproduksjonen og tap i husdyrhaldet - i Oppdal er no rapportert til Fylkesmannen i Sør Trøndelag. Eg har teke for meg områda bygda og Drivdalen som utgjer det meste av arealet der vånd er eit stort problem. Etter å ha rekna på dette har eg kome fram til at ein gjennomsnittsgard i dette området (på 190 dekar) få ein ekstrautgift på 30 000 kr i året på grunn av vånd. Tilsaman utgjer dette 3,8 millioner kroner i ekstrautgifter og tap på avlinger per år for Oppdalslandbruket. (Heile rapporten finn du som fil under arkfana fagartikler.)

 Det er i dette prosjektet gjort systematisk registreringar av skadeomfanget i planteproduksjonen av vånd. Det er òg forsøkt finne omfanget av tapet i husdyrproduksjonen på grunn av sjukdom relatert til vånd. Det er utført ei spørjeundersøking hjå gardbrukarane i kommunen, det er gjort registreringar i samband med jordprøvetaking og det er registreringar i samband med gardsbesøk/rådgjeving gjennom vekstsesongen. Områda som er med i dette prosjektet er Bygda og Drivdalen, som utgjer 23800 dekar eng. Det er godt samsvar mellom registreringane som er gjort, i høve skadeomfanget og tiltaka som er utført. Ekstrautgiftene kjem av ulike ekstratiltak på arealet: brakking 5,79%, pløying 5,79%, slodding/harving av enga 25,81%, ikkje høsta areal 5,29% og ekstra ugrassprøyting 2,46%. På eit gjennomsnittsbruk i Oppdal på 192 daa, blir dette ein ekstra kostnad på kr 30.883 per år. Ekstra utgifter i planteproduksjonen på 23800 dekar i området Bygda og Drivdalen, blir da på 3.8 millionar kr.

I husdyrhaldet er det tapet på grunn av sjukdom relatert til listeria bakterien, ein har sett på. Dette er kasting av foster, svake lam ved fødselen og lam som dør etter nokre dagar. I tillegg får ein hjernebetennelse på vaksne sauer, forårsaka av listeria. Det var i utgangspunktet meininga å rekne på tapet i husdyrhaldet, men på grunn av ufullstendig talmateriale er denne delen ikkje utført. Vi fekk for få svar frå brukarana på spørjeundersøkinga i 2010, til at vi kan rekne på tapet. Etter at vi har leita i tal frå husdyrkontrollen og noteringar på bruksnivå, skjønar vi at tala ikkje er så lett tilgjengelege. Det må til eit større arbeid der ein går meir nøye inn i husdyrkontrollen og noteringar hjå brukarane, om ein skal kunne finne omfanget av eit tap. Dette kan bli aktuelt for ein student frå HINT å gjere, i samband med ei oppgåve til vinteren. Tala vi har frå veterinærane syner ikkje endringar i behandla hjernebetennelse attende til 2006. Veterinærane antar at det er store mørketal her, da mange dyr vert avliva eller døyr, før ein rekk å behandle dei. Noregs veterinærhøgskole har i 2010 satt i gang eit prosjekt der ein ønsker å finne årsaka til lammedød. Fleire bruk i Oppdal er med på dette prosjektet. Det vert spesielt interessant å få stadfesta om det er mykje listeriose som er årsaka til at lamma døyr i Oppdal.